Mat 16 | ZomZIV | STEP | Pharisee-te le Sadducee-te Jesu kiangah pai uh a, vantung pan lim khat ngetna tawh amah a zia-et uh hi.

Matthew 16

Lim khat Kalhna

1 Pharisee-te le Sadducee-te Jesu kiangah pai uh a, vantung pan lim khat ngetna tawh amah a zia-et uh hi.

2 Amah in, ^{▼▼16.2 Khutgelh masa pawlkhat in tg. 2 bansiah le tang 3 buppi nei lo hi} “Nitakin, ‘Meiisan a suah ciangin khuapha ding hi,’ na ci uh a, 3 zingsangin, ‘Meiisan suak a khua a nim ciangin huihpi nungin guahpi zu ding hi,’ na ci uh hi. Van maitang pianzia na khiat theih uh hangin hun lahna limte na thei thei kei uh hi. 4 A tatkhel le angkawmhat hih khang mite in lim lamdang a zon uh hangin Jonah lim longal adang khat beek a kilak kei ding hi,” ci-in a dawng hi. Tua ciangin Jesu in amaute nusia in a paikhia hi.

Pharisee-te le Sadducee-te Silngo

5 Tuilipi a kantan laitakun nungzuite in an a pua mangngilh uh hi. 6 Jesu in amaute kiangah, “Pilvang unla, Pharisee-te le Sadducee-te silngo panin kikem un,” a ci hi. ^b

7 Amaute in, “Anlum khat beek i puak loh hang hi,” ci-in amauteng a kikum uh hi.

8 Jesu in amaute kikupna a theih ciangin, “Upna neute aw, bang hangin anlum om loh thu kikum tazen na hi uh hiam! ^c 9 Theitel nai lo lailai na hi uh hiam? Mi tul nga ading anlum nga le a val bawm bangzah na kaikhawm uh cih phawk nawn lo na hi uh hiam? 10 Ahikeh mi tulli adingin lum sagih le a val bawm bangzah na kaikhawm uh cih phawk nawn lo na hi uh hiam? 11 Bangci-a an thu gen ka hi loh lam theitel lo na hi uh hiam? Ahi hangin Pharisee-te le Sadducee-te silngo panin na kikem un,” a ci hi. 12 Tua ciangin anlum bawl cianga kizang silngo gen hi loin Pharisee-te le Sadducee-te hilhna pana kikep ding gen ahilam a theitel pan uh hi. ^d

Peter in Christ a Pulakna

13 Caesarea Philipi kuala Jesu a pai ciangin a nungzuite kiangah, “Mite in Mihing Tapa kua hi, a ci uh hiam?” ci-in a dong hi.

14 Amaute in, “Mi pawlkhat in, ‘Baptize-pa John hi; pawlkhatte in Elijah hi; pawlkhat leuleu in, Jerimiah hiam, kamsang khatpeuh hiam, hi ding hi,’ hong ci uh hi,” ci-in a dawng uh hi. ^e

15 “Tua ahileh no e leh? Kei kua hi nong ci uh hiam?” ci-in a dong hi.

16 Simon Peter in, “Nang, a nungta Pasian Tapa, Christ ^{▼▼16.16 Ahikeh Messiah; tg. 20 ah zong} na hi hi,” ci-in a dawng hi. ^g

17 Jesu in, “Jonah tapa Simon aw, thupha ngah na hi hi; ahang in, hih in mihing hong laak hi loin vantung a om ka Pa hong laak ahi hi. 18 Tua hi a, nang Peter ^{▼▼16.18 Peter a khiatna suangtum} na hi hi. Hih suangpi tungah ka pawlpi ka phut dinga Gawtmun ^{▼▼16.18 Ahikeh meilipi} kongpite in a zo zo kei ding uh hi. ^{▼▼16.18 Ahikeh hatzaw lo ding hi} 19 Vantung gam tawhtangte nang kong pia ding hi. Leitung a na hen peuhpeuh vantungah kihen dinga ^{▼▼16.19 Ahikeh hikhin}, leitung a na phel peuhpeuh vantungah kiphel ding ^{▼▼16.19 Ahikeh hikhin} hi,” a ci kik hi. 20 Tua ciangin Jesu in amah Christ ahilam kuamah a hilh loh nadingun a nungzuite a vauhilh hi.

Jesu in A Sih ding Genkhol

21 Jerusalem ah Jesu pai-in upate, siampi makaite le thukham siate khutah tampi thuak pelmawh dinga, pel loin amah kithatin, a ni thum ni ciangin kihingkiksak ding hi, cih thute tua hun pana kipan a nungzuite a hilhcian hi.

22 Peter in amah tang paikhiatpih in tai a, “Topa, hi ngei mahmah lo e! Hih thu nang tungah tung ngei peuhmah lo ding hi!” a ci hi. ^m

23 Jesu kihei a Peter kiangah, “Satan ka nunglamah kihem in! Kei adingin kimuk-tukna na hi hi. Pasian thute ngaihsun loin mihing thute na ngaihsun hi,” a ci hi.

24 Tua ciangin Jesu in a nungzuite kiangah, “Mi khatpeuh in ka nung hong zuih ding leh amah le amah kinialin, ama singlamteh kisuanin hong zuih pelmawh kul hi. 25 Ahang in, ama nuntakna ^{▼▼16.25 Greek ah hinna ahikeh kha kici hi; tg.26 ah zong} a honkhia nuamte in taan dinga, ahi hangin kei hanga ama nuntakna a taante in, nuntakna a ngah ding hi. 26 Mi khatpeuh in leitung buppi a neih hangin a hinna tanlawh leh ama adingin bang phatuam ding ahi hiam? Ahikeh mi khatpeuh in ama kha bang tawh khek thei ding ahi hiam? 27 Ahang in, Mihing Tapa ama vansawl takte tawh a Pa minthanna kengin hong pai ding hi. Tua ciangin mi khempeuh in amau sepna tawh kizui-in pahtakman a sang ciat ding uh hi. 28 Thutak kong geninah, hih lai-a ding mi pawlkhat in, Mihing Tapa ama kumpi-gam tawh hong pai, a muh matengun sihna a ciamkha kei ding uh hi,” a ci hi. ^o